fbpx

UNICEF ထုတ်ပြန်မှုများ ကျင့်ဝတ်နဲ့မညီဟု မြန်မာစစ်ကောင်စီ ဝေဖန်

စာသင်ကျောင်းတွေမှာ တပ်စွဲထားတဲ့ကိစ္စအပေါ် UNICEF ကုလသမဂ္ဂ ကလေးများရန်ပုံငွေအဖွဲ့ရဲ့ ထုတ်ပြန်ချက်ဟာ မျှတမှုမရှိသလို ကျင့်ဝတ်နဲ့ မညီဘူးလို့ မြန်မာစစ်ကောင်စီက ဝေဖန်အပြစ်တင်လိုက်ပါတယ်။

စာသင်ကျောင်းတွေကို မီးရှို့တာ၊ ဗုံးခွဲတိုက်ခိုက်တာတွေကြောင့် စစ်တပ်က လုံခြုံရေး ယူပေးနေရတဲ့သဘော ဖြစ်တယ်လို့လည်း စစ်ကောင်စီ ပြောခွင့်ရသူက ဒီနေ့ သတင်းစာရှင်းလင်းပွဲမှာ ပြောလိုက်တာပါ။ အပြည့်အစုံကို ကိုသားညွန့်ဦး တင်ပြပေးထားပါတယ်။

မြန်မာနိုင်ငံမှာ စာသင်ကျောင်းတွေ တိုက်ခိုက်ခံရတဲ့ကိစ္စ UNICEF ကုလသမဂ္ဂ ကလေးများရန်ပုံငွေအဖွဲ့ ထုတ်ပြန်ချက်မှာ စာသင်ကျောင်းတွေကို စစ်တပ်က တပ်စွဲထားတဲ့ကိစ္စ အလေးပေး ပြောဆိုတာဟာ မျှတမှုမရှိဘူးလို့ စစ်ကောင်စီ ပြောခွင့်ရပုဂ္ဂိုလ် ဗိုလ်ချုပ်ဇော်မင်းထွန်းက ဒီကနေ့ သတင်းစာရှင်းလင်းပွဲမှာ ပြောသွားတာပါ။ တပ်စွဲတဲ့ကိစ္စကိုပဲ ရည်ညွှန်းပြောဆိုပြီး ကျူးလွန်တဲ့သူကို ကွဲကွဲပြားပြား ဖော်ပြတာမျိုး မရှိဘူးလို့ ဗိုလ်ချုပ်ဇော်မင်းထွန်းက ပြောသွားပါတယ်။

“UNICEF မြန်မာရုံးရဲ့ သတင်းထုတ်ပြန်ချက်မှာ စာသင်ကျောင်း ပညာရေး အဆောက်အအုံတွေမှာ တိုက်ခိုက်ခံရတာတွေနဲ့ ပညာရေး အဆောက်အအုံတွေကို တပ်မတော်က အသုံးပြုတယ်ဆိုတဲ့ ပုံစံမျိုး ထင်ယောင်ထင်မှားဖြစ်အောင် ကိန်းဂဏန်းတချို့နဲ့ ရေးသားဖော်ပြထားတာ တွေ့ရပါတယ်။ NLD, NUG, PDF တို့ကို ထောက်ခံသူအချို့ဟာ ပညာရေးဝန်ထမ်းတွေ အပါအဝင် နိုင်ငံ့ဝန်ထမ်းတွေ အလုပ်မလုပ်ရေးနဲ့ အစွန်းရောက်ကိစ္စတချို့မှာ အခုလို စာသင်ကျောင်းတွေ၊ ပညာရေး အဆောက်အအုံတွေ၊ ရုံးတွေကို ဗုံးခွဲတာ၊ မီးရှို့တာ၊ လူသတ်တာအထိ ကျူးလွန် လှုံ့ဆော် အားပေးနေတာ သိသာထင်ရှားပါတယ်။ ခုန ကျနော် ဗွီဒီယိုဖိုင်တွေနဲ့ ပြပြီးပါပြီ။ လက်တွေ့လုပ်ခဲ့တဲ့လူတွေလည်း ပြပြီးပြီ။ ဒီဘက်မှာ ထပ်ပြီးတော့ ဇယားနဲ့ NLD ပါတီဝင်တွေရဲ့ လှုံ့ဆော်မှုတွေ၊ သူတို့ရဲ့ အကြမ်းဖက်မှုတွေ၊ သူတို့ရဲ့ လှုံ့ဆော်မှုတွေကြောင့် ဘာတွေလုပ်ခဲ့တယ် ဆိုတာလည်း ပြထားပါတယ်။ အဲဒီ အကြမ်းဖက်လုပ်ရပ်တွေကနေ ကာကွယ်ဖို့အတွက် တပ်ဖွဲ့ဝင်တချို့ လုံခြုံရေး ဝင်ရောက် ဆောင်ရွက်ပေးနေရတာ ရှိပါတယ်။ UNICEF ရဲ့ ထုတ်ပြန်ချက်ထဲမှာ ကျူးလွန်တဲ့သူကို ကွဲကွဲပြားပြား ဖော်ပြမထားတာကြောင့် အထင်အမြင် လွဲမှားစေနိုင်ပါတယ်။”

စာသင်ကျောင်းတွေ အပါအဝင် အုပ်ချုပ်ရေးရုံးတွေနဲ့ မြို့ပေါ်နေရာ အတော်များများမှာ ဖြစ်နေတဲ့ ဗုံးခွဲမှုတွေ၊ မီးရှို့မှုတွေကို NUG အမျိုးသားညီညွတ်ရေးအစိုးရနဲ့ ဆက်စပ်အဖွဲ့တွေက လုပ်နေတယ်လို့ မြန်မာစစ်ကောင်စီက ဒီကနေ့ သတင်းစာရှင်းလင်းပွဲမှာ ပြောပါတယ်။ ဒါပေမယ့်လည်း တဖက် NUG နဲ့ သူ့ကိုထောက်ခံသူတွေဘက်ကလည်း ဒါဟာ စစ်ကောင်စီကို လိုလားတဲ့ ပျူစောထီးအဖွဲ့တွေက လုပ်နေတာဆိုပြီး စွပ်စွဲပြောဆိုတာတွေ ရှိပြန်ပါတယ်။

သူတို့အနေနဲ့ ဥပဒေမဲ့ အကြမ်းဖက်တိုက်ခိုက်မှုတွေကို လုပ်မှာမဟုတ်သလို အားပေးအားမြှောက် ကူညီလှုံ့ဆော်တာလည်း မလုပ်ဘူးလို့ အမျိုးသားညီညွတ်ရေးအစိုးရဘက်က တရားဝင်သဘောထား ထုတ်ပြန်ထားပါတယ်။

မြန်မာနိုင်ငံမှာ ဖေဖော်ဝါရီလ ၁ ရက်နေ့ စစ်တပ်က အာဏာသိမ်းပြီးနောက် ကန့်ကွက်ဆန္ဒပြမှုတွေ နိုင်ငံအဝန်း ရှိခဲ့သလို ဒါကို စစ်တပ်က အကြမ်းဖက် နှိမ်နင်းတာကြောင့် အရပ်သား ၈၀၀ ကျော် သေဆုံးခဲ့ရပြီလို့ AAPP နိုင်ငံရေးအကျဉ်းသားများ ကူညီစောင့်ရှောက်ရေးအသင်းက ထုတ်ပြန်ထားပါတယ်။ စစ်ကောင်စီဘက်ကတော့ ဒီကိန်းဂဏန်းဟာ ချဲ့ကားတယ်ဆိုပြီး လက်မခံထားပါဘူး။

အဲဒီနောက် စစ်ကောင်စီဘက်က စာသင်ကျောင်းတွေကို ပြန်ဖွင့်တော့လည်း စစ်ကောင်စီဆန့်ကျင်ရေး အင်အားစုတွေဘက်က ကျောင်းမတက်ကြဖို့ ကျောင်းသားတွေကိုရော ဆရာတွေကိုပါ လှုံ့ဆော်ခဲ့ပါတယ်။ အဲဒီနောက် စာသင်ကျောင်းတွေ ပြန်ဖွင့်ကတည်းက ဗုံးပေါက်ကွဲမှုတွေ နေ့တိုင်းလိုလို ဖြစ်လာတာပါ။ ဒီနေ့ စစ်ကောင်စီရဲ့ သတင်းစာရှင်းလင်းပွဲ အတွင်းမှာတော့ ဒါတွေဟာ NUG နဲ့ သူ့ကိုထောက်ခံတဲ့ အင်အားစုတွေလက်ချက် ဖြစ်တယ်ဆိုပြီး ဖမ်းမိရသူတွေကို သက်သေထူပြီး စစ်ကောင်စီက ရှင်းလင်းပြောကြားပါတယ်။

UNICEF ရဲ့ ဒီထုတ်ပြန်ချက်တွေနဲ့ ပတ်သက်လို့ နိုင်ငံခြားရေးဌာနဘက်က UNICEF ကို စာပို့ထားတယ်လို့ ပြောပါတယ်။ မင်းတပ်မှာ ရေဖြတ်တယ်ဆိုပြီး UNICEF ထုတ်ပြန်ချက်ဟာလည်း မှားယွင်းတယ်လို့ ဗိုလ်ချုပ်ဇော်မင်းထွန်းက ပြောပါတယ်။ UNICEF အနေနဲ့ နိုင်ငံတကာ အဖွဲ့အစည်းတရပ်ရဲ့ ကျင့်ဝတ်သိက္ခာနဲ့အညီ ရပ်တည်လိုက်နာသင့်တယ်လို့ စစ်ကောင်စီပြောခွင့်ရသူက ဒီနေ့ သတင်းစာရှင်းလင်းပွဲမှာ ပြောခဲ့ပါတယ်။

“လုံခြုံရေးတပ်ဖွဲ့ဝင်တွေက စာသင်ကျောင်းတွေကို လုံခြုံရေး လုပ်မပေးရင် ဒီမိုကရေစီအမည်ခံ အကြမ်းဖက်သမားတွေက စာသင်ကျောင်းတွေ၊ ကျောင်းသူ ကျောင်းသားတွေ၊ ဆရာ ဆရာမတွေကို မနှောင့်ယှက်ဘူး၊ အကြမ်းမဖက်ဘူးလို့ UNICEF အနေနဲ့ အာမခံပါသလား။ လက်တွေ့မှာတော့ မနေ့ကအထိ ကျောင်းတွေမှာ မိုင်းခွဲတာတွေ၊ မီးရှို့တာတွေ ဖြစ်နေတာ တွေ့ရမှာ ဖြစ်ပါတယ်။ အခုလည်း ဘယ်သူတွေ လုပ်နေတယ်ဆိုတာ ကျနော်တို့ သက်သေအထောက်အထား စုံစုံလင်လင်နဲ့ ပြသပြီး ဖြစ်ပါတယ်။ ဒီအကြမ်းဖက်လုပ်ရပ်တွေကြတော့ ခုနပြောတဲ့ အပြည်ပြည်ဆိုင်ရာ အဖွဲ့အစည်းတခုဖြစ်တဲ့ UNICEF အဖွဲ့က နှုတ်ဆိတ်နေတယ်၊ နှုတ်ပိတ်နေတယ်၊ မသိချင်ယောင် ဆောင်နေပါတယ်။ ကျောင်းတွေ ကလေးတွေ ဆရာ ဆရာမတွေ နှောင့်ယှက်ခံရတာတွေဟာ ခင်ဗျားတို့ရဲ့ လိုတမျိုး၊ မလိုတမျိုး မူဝါဒကြောင့်လည်း ပါတယ်လို့ ကျနော် ပြောချင်ပါတယ်၊ ဒီနေရာကနေ။ ဒီမူဝါဒကြောင့်လည်း အကြမ်းဖက်တွေက အတင့်ရဲလာကြတာ ဖြစ်တယ်လို့လည်း ကျနော် ပြောချင်ပါတယ်။ ကမ္ဘာ့ကုလသမဂ္ဂရဲ့ ပဋိညာဉ် စာတမ်းပေါ့နော်၊ စာပိုဒ်ပေါ်မှာ နိုင်ငံတနိုင်ငံရဲ့ ပြည်တွင်းစီရင်ပိုင်ခွင့် အာဏာအတွင်း၌ သက်ရောက်နေတဲ့ ကိစ္စမျိုးများတွင် ဝင်ရောက်စွက်ဖက်ရန် အခွင့်အာဏာ မရှိစေရလို့ ပြဋ္ဌာန်းထားတာ ရှိပါတယ်။ ဒါတွေကို ဂရုပြုဖို့ လိုပါတယ်။ UNICEF အဖွဲ့အနေနဲ့ကတော့ ကုလသမဂ္ဂအဖွဲ့၊ နိုင်ငံတကာအဖွဲ့အစည်းပီပီ ကျင့်ဝတ်သိက္ခာတွေကို လိုက်နာသင့်တယ်လို့ ကျနော်တို့ ပြောလိုပါတယ်။”

ဇွန်လဆန်းပိုင်းက ထုတ်ပြန်တဲ့ UNICEF ကြေညာချက်ထဲမှာတော့ စာသင်ကျောင်းတွေကို ပစ်မှတ်ထား တိုက်ခိုက်တာ၊ အကြမ်းဖက်တာတွေကို ကန့်ကွက်ရှုတ်ချထားသလို ပဋိပက္ခအတွင်း ပညာရေးဌာနတွေကို အကာအကွယ် ပေးကြဖို့လည်း တိုက်တွန်းထားပါတယ်။ စာသင်ကျောင်းတွေကို စစ်တပ်က တပ်စွဲ နေရာယူထားတာတွေကိုလည်း ထောက်ပြခဲ့တာ ဖြစ်ပါတယ်။ စစ်ကောင်စီရဲ့ ဒီနေ့ သတင်းစာရှင်းလင်းပွဲ အတွင်းမှာတော့ ဗုံးခွဲတိုက်ခိုက်မှုတွေအတွက် တိုင်းရင်းသားဒေသတွေမှာ သင်တန်းပေးခဲ့တယ်လို့ ပြောသလို တိုက်ခိုက်မှုတွေကို NUG နဲ့ NLD ခေါင်းဆောင်တချို့က စေခိုင်းတယ်ဆိုပြီးတော့လည်း စွပ်စွဲထားပါတယ်။